Blogg frá Tokyo

Nokkrar myndir úr símanum. Reyni að gera þetta reglulega, sérstaklega ef ég er latur að skrifa.

Var að borga leiguna mína á vistinni um daginn þegar einn starfsmaðurinn spyr hvort mig langi að fara í viðtal hjá BBC. Kom í ljós að það var BBC crew á vistinni að gera smá heimildarmynd um Haruki Murakami (bjó á vistinni í gamla daga) og vantaði útlending til að commenta eitthvað fallegt. Benti þeim að tala frekar við Daryl vin minn, sem er sérlega fróður um kauða. Soldið fyndið að þeir myndi helling á vistinni sem fékk frekar slæma útreið í Norwegian Wood. Hlustaði á viðtalið, ótrúlega leiðandi spurningar. Hlakka til að sjá útkomuna í maí.

Fórum svo í smá kveðju-hádegismat nokkur saman því Daryl er að fara eftir viku. Skelltum í tveggja stjörnu Michelin hádegismat. Það var gott.

Á veitingarstaðnum vildi eigandinn endilega láta Röggu sitja á stól fyrir framan okkur. Gerir það að verkum að þetta lítur út eins og fyrrverandi eiginmannaklúbburinn hennar Röggu. Gott stöff.

Sló til og keypti mér sjónvarp í vikunni. Ekki seinna vænna, næstum heilt sjónvarpslaust ár. Skrapp útí búð og daginn eftir…bamm, heimsending og allt tengt fyrir mann. Planið er að massa smá japönsku í mars og reyna að kom henni á skrið, svo maður sé nú ekki alltaf að bölva hvað maður sé lélegur.

Nokkrar stöðvar hér í Tokyo senda út frítt í háskerpu og ég ætla aldrei að horfa á venjulega útsendingu aftur, þó sérstaklega íþróttir. Nú er bara að redda sér Blue-ray spilara, kannski playstation, og þá er masterplanið fullkomið. Gott að þetta hallærislega diskastríð sé búið.

Stóð til að gera helling um helgina og vera svo með stórbrotið blogg á morgunn en allt fór í vaskinn. Búið að vera stormviðri alla helgina og öllu cancellað, hafnaboltaleikur sem ég ætlaði að horfa á og fleira gott verður því að bíða betra vloggs.

Joseph Stiglitz kom annars til Waseda í vikunni og hélt slakan fyrirlestur um galla alþjóðavæðingar, eitthvað smá rúnk til að maður kaupi bókina hans (virkaði í mínu tilfelli).

Við félagarnir vorum síðan eitthvað að ræða það hvað japanskir stjórnmálamenn eru búnir að vera litlausir eftir að Koizumi hætti í fyrra. Abe reyndist alger ræfill og ekki virðist nú taka betra við með nýja gaurinn, Fukuda. Klára á skemmtilegri sögu um ráðherran sem Koizumi tók við af, Yoshiro Mori.

Sagan segir Mori hafi verið sérlega slakur í ensku en viljað ganga í augun á Bill Clinton þegar hann kæmi í heimsókn til Japan. Mori hafi því lagt sérlega hart að sér og lært nokkra grundvallar frasa. “How are you?” , “…fine and you?” og fleira í þeim dúr. Þegar loksins kemur að því að hitta Clinton, tekur Mori í höndina á honum og segir : “WHO are you?”. Clinton fipast eitthvað en tekur þessu sem góðu gríni og segir :”I am Hillary´s husband and you?”. Sem Mori svaraði að bragði “Me too!”

Tek samt Koizumi hvenær sem er, ég meina tékkiði á vídjóinu (gott þegar hann klessir á pottablómið og allir stressast upp í kringum hann). Fór strax að hugsa um GOB úr Arrested Development.

Í dag var haldið uppá 125 ára afmæli Waseda-háskóla. Heljarinnar húllumhæ með skrúðgöngum og látum í gangi í allan dag. 125 ár er víst merkilegt fyrir þær sakir að stofnandi skólans vildi meina að 125 ár væri hinn fullkomni aldur til að deyja. Sjálfur dó hann 84 ára að aldri.

Lifum lengi og döfnum, 125 er víst gott ár!

Stóð ekki til að vera með eitthvað neytendablogg en mér fannst ég tilneyddur. Fór með tvær skyrtur í hreinsun til eldri manns sem rekur litla fatahreinsun rétt hjá skólanum (styðja litla manninn). Borgaði 400 japönsk yen, sem gera rúmar 200 íslenskar krónur og fékk þær til baka eins og nýjar. Stífpressaðar, pakkaðar inn í plast, með litlum pappaslaufum undir krögunum og svo borði með slaufu utan um allt draslið, bókstaflega eins og nýjar (ef ekki nýrri).

Ég man nú ekki hvað ég borgaði seinast fyrir hreinsun á skyrtu heima en ég athugaði verðlistann hjá Kjól og Hvítu og þar hefði ég þurft að borga 1120 íslenskar krónur fyrir hreinsunina. Ég ætla nú seint að þykjast vita mikið um sparnað en mér fannst þetta vera heljarinnar munur, jafnvel hægt að kalla þetta OKUR.  Ef þið viljið láta hreinsa skyrtur, sendið þær bara til Japan, gæti borgað sig ef þið sendið nokkur hundruð stykki.

Skólinn byrjaði í dag eftir tveggja mánaða frí. Feginn að loksins sé allt komið á skrið, þarf að snúa sólarhringnum aftur við og rembast við að vakna snemma næstu daga. Sjáum til hvernig það gengur. Annars fer þessi vika í að sitja og velja áfanga.

Er svo líka að hjálpa strákunum sem sjá um fótboltaliðið að recruita nýja gaura, eftir að helmingurinn fór heim í sumar. Hengja upp plaköt og svona, setja saman góða grúppu af fólki.

Svo er það komið á hreint , kem heim 17.des og verð í næstum þrjár vikur yfir jólin og Music Mind Reader, stefnir allt í góða keppni. Allir að koma heim frá útlöndum í fríið.

Var ánægður að sjá að Super Furries eru að koma eftir mánuð, nýja platan helvíti fín. Best er samt nýja myndbandið þar sem snillingurinn Matt Berry úr Darkplace og Snuff Box fer á kostum.